Nasehat

Bukiktinggi nak taruih ka Baso
Ka Payokumbuah harilah sanjo
Hutang ameh tantu lah biaso
Basangkuik budi susah balehnyo

Sutan Sati yo babaju lakan
Pai ka balai naiak lah kudo
Pangkek tinggi yo ajuangnyo badan
Indak babudi urang tak sangko

Marantak kudo si Angku Damang
Tando nagari nan ka baparang
Sungguahpun kayo nan dipandang urang
Bansaik babudi disayang urang

Rami balainyo urang Kurai Taji
Manuka anak urang Ampalu
Elok budi yo pakaian diri
Kamari pai urang katuju

Baca Selengkapnya

Minta Maaf

Anak lah bakiak di tangah lah sawah
Tabang lah punai kadalam padi
Kambang lah lapiak sapu lah rimah
Indang dimulai lah hanyo lai

Sabalun indang, indang ka dimulai
Kami susun, yo susun sapuluah jari
Kalau lah ado kato nan tagajai
Maaf dipintak yo ampunkan kami

Kami baindang ganti baganti
Nantikan kami sampai parak siang
Baitu adaik alek nagari
Pusako lamo indak ka hilang

Kalau ado, yo ado jarum nan patah
Usah simpan oi kanduang didalam peti
Kalau ado, yo ado kato nan salah
Usah simpan oi kanduang didalam hati

Sandang lah pangapan padi tu kini
Ambiak ka baniah banamo si lantiak bega
Kadipangakan hati ko kini
Kok lai buliah ka sanak mamintak aka

Sabalah saba si bayang serai
Hari lah laruik ditangah malam
Kok ado kato nan lah tagajai
Saketek usah manjadi dandam

Baca Selengkapnya